અનુપમા

મુક્તપંચિકા: 29/03/07 

* * * * * * * *  

સ્મિત-રૂદન

કરી શકું છું.

હૈયા-હિલોળે પ્રેમ

કરી શકું છું.

માણસ છું હું.

* * * * * * *

.

ગુજરાતી નાટ્યકાર રણછોડભાઈ દવે અને દાદાસાહેબ ફાળકેની ફિલ્મ

ભારતની પ્રથમ ફીચર ફિલ્મ “રાજા હરિશ્ચંદ્ર”.

દાદાસાહેબ ફાળકે ના દિગ્દર્શનમાં બનેલી ફિલ્મ “રાજા હરિશ્ચંદ્ર” ઈ.સ. 1913માં મુંબઈમાં રજૂ થયેલી તે આપ જાણો છો.

આ ફિલ્મની પટકથા માટે દાદાસાહેબ ફાળકેએ ગુજરાતના આદ્ય નાટ્યકાર રણછોડભાઈ ઉદયરામ દવેના નાટકનો આધાર લીધો હતો.

“રાજા હરિશ્ચંદ્ર” ફિલ્મના ટાઈટલ્સમાં દાદાસાહેબ ફાળકેએ રણછોડભાઈ દવેના નામની ક્રેડીટ મૂકેલી છે.

ભારતીય ફિલ્મઉદ્યોગ (ચલચિત્ર ઉદ્યોગ) ના પાયામાં ગુજરાતનું વિશિષ્ટ યોગદાન રહેલું છે.

. . . . . વિશેષ માહિતી વાંચો:

રણછોડભાઈ દવે : (1) મધુસંચય (2) ગુજરાતી સારસ્વત પરિચય

દાદાસાહેબ ફાળકે : (1) અનામિકા (2) અનુપમા

* * * * * * * * * * * * * * * * * * * *

.

સ્વ. રમણભાઈ મહીપતરામ નીલકંઠ ને આપણે સાક્ષર તરીકે જાણીએ. 

તેમનાં પુત્રી વિનોદિનીબહેન નીલકંઠ ને આપણે લેખિકા-સમાજસેવિકા તરીકે ઓળખીએ.

એક વિશેષ વાત તમને રોચક લાગશે. 

1949નું વર્ષ. અમદાવાદમાં ‘ગુજરાત વિદ્યાસભા’ના શતાબ્દિ મહોત્સવની ઉજવણી.

તે નિમિત્તે રમણભાઈ નીલકંઠનું “રાઈનો પર્વત” નાટક ભજવાયેલું. તેમાં જાલકાના પાત્રમાં વિનોદિનીબહેન હતા. વિનોદિનીબહેનનો સુંદર અભિનય પ્રશંસા પામ્યો હતો. 

ગુજરાતના પ્રતિષ્ઠિત સાક્ષર-પરિવાર વિષે જાણો:

મધુસંચય

સારસ્વત પરિચય

.

અમે ને તમે : મુક્તપંચિકા:

અમે ને તમે … ચાલો, વાંચીએ મુક્તપંચિકા મઝાની!

* * * * * * * * *

અમે વાદળ

આભ ઊડંતાં

ને તમે સરસર

સરતી, આંખ

આંજતી વીજ.

* * * * * * * * *

અમે સાગર

તીરે હળવે

ઊઠતી લ્હેર, તમે

મધદરિયે

ઝૂમંતાં મોજાં.

* * * * * * * * * * 

અમે મધુર

હસ્તનો સ્પર્શ

ને તમે કો’ કંપેલી

સિતાર જાણે

ઝણઝણતી.

* * * * * * * * * *

અમે કંપન

પામી, નાજુક

નાની વેલ, ને તમે

વાસંતી મદ-

ભર્યા વાયરા.

* * * * * * * * * * 

ઉપરની પ્રથમ બે મુક્તપંચિકાઓ મેં “સહિયારું સર્જન” પર  પ્રગટ કરેલી છે.   

 …………. * * * *  હરીશ   દવે  અમદાવાદ

.

મુક્તપંચિકા : પ્રિય મિત્ર સુરેશભાઈ જાનીના જન્મદિને (05/03/2007) 

* * * * * * * * * *

જીવન અહીં

આ પળભર

જાણી, હરખે માણે

ક્ષણને, જાની

સુરેશભાઈ. 

* * * * * * * * * * 

* * * * * * * * * *

મુક્તપંચિકા (2)

ચોસઠ તોયે

ચાર વર્ષના

દાદા બાળક નાના,

ક્ષણે ક્ષણનું

જીવન માણે

* * * * * * * * * *

* * * * * * * * * *

મુક્તપંચિકા (3)

અનંતયાત્રા

જીવન કેરી

ક્ષણમાં જાણી, માણી,

ઉચરે વાણી

સુરેશ જાની.

* * * * * * * * * *

* * * * * * * * * *

આ મુક્તપંચિકાઓ સાથે જન્મદિનની મુબારકબાદી, સુરેશભાઈ! ……  હરીશ દવે  … અમદાવાદ

. 

મુક્તપંચિકા : 04/03/2007 (હોળી) 

ફાગણનો મહિનો.

હોળી-ધૂળેટીનો રંગભર્યો તહેવાર …..

અને અનુપમા પર મુક્તપંચિકામાં રગછાંટણાં ન થાય તો કેમ ચાલે?

 * * * * * * * * * * * * *

મુક્તપંચિકા: હોળી (1)

મત્તછકેલું

રાતું જોબન

ફાગણ કેરા રંગે

રંગાતું જાતું

સાજન સંગે. 

* * * * * * * * * *

મુક્તપંચિકા: હોળી (2)

રંગરસીલી

કેસરકાયા

કેસૂડાની – ભીંજાતી

નમણી નારી

સમ- વિલસે. 

* * * * * * * * * *

મુક્તપંચિકા: હોળી (3)

નવપલ્લવ

કેસૂડા કેરી

શાખે ફાગણ છાંટે

ચિત્તાકર્ષક

રંગબહાર. 

* * * * * * * * * *

મુક્તપંચિકા: હોળી (4)

ફાગણભીના

કેસૂડાસમ

કેસરવર્ણી કાયા

ભીંજે સાજન

કેરી નજર્યું.

* * * * * * * * * * *

 આપ મારી રચેલી અન્ય મુક્તપંચિકાઓ ઊર્મિબહેન સંચાલિત “સહિયારું સર્જન” પર વાંચી શકશો. … હરીશ દવે  … અમદાવાદ